javascript is disabled, enable it otherwise the site will not work properly!

javascript est désactivé, activez-le sinon le site ne fonctionnera pas correctement !

Վիքիակումբ

Վիքիակումբ, «Վիքիմեդիա Հայաստան» գիտակրթական հասարակական կազմակերպության կրթական ծրագրերի շրջանակներում իրականացվող հեղինակային նախագիծ։ Հայաստանի և Արցախի տարբեր բնակավայրերում գործել է «Վիքիմեդիա Հայաստանի» հիմնադրած երկու տասնյակից ավելի վիքիակումբ։ Ներկայումս Հայաստանի տարածքում գործում է յոթ վիքիակումբ։

2016 թվականին Վիքիակումբ նախագիծը «Վիքիմանիա» համաժողովի ժամանակ ճանաչվել է «Տարվա ամենացնցող նախագիծ» (անգլ.՝ The Coolest Project):

Նկարագրություն

Վիքիակումբը ոչ ֆորմալ կրթության օղակ է։ Թեև դրա հիմնական այցելուները դպրոցականներն ու երիտասարդներն են, սակայն կազմակերպությունը խթանում է նաև մեծահասակների ընդգրկումը։

Վիքիակումբ հաճախողները համակարգողի օգնությամբ սովորում են աշխատել հայերեն վիքիպեդիայում և մյուս քույր նախագծերում։ Համակարգողը այցելուներին սովորեցնում է խմբագրման հիմնական կանոնները, հետևում նրանց ստեղծած հոդվածներին։

Վիքիակումբների հիմնադրումը կարևոր է հատկապես գյուղական համայնքներում, որտեղ երեխաներն ունեն սահմանափակ հետաքրքիր զբաղմունքներ։

Վիքիմեդիա Հիմնադրամի գործադիր տնօրեն Քեթրին Մաերը Դիլիջանում անցկացված Wikimedia CEE Meeting 2016-ի ժամանակ նշել է, որ հայկական վիքիհամայնքի իրականացրած Վիքիճամբար և Վիքիակումբ նախագծերը եզակի են ամբողջ աշխարհում, և մյուս համայնքները դիտում են Հայաստանը՝ որպես այս ոլորտի առաջատար և ընդօրինակման մոդել։

Նպատակ

Վիքիակումբի հիմնական նպատակն է դպրոցականներին և համայնքի այլ անդամներին մասնակից դարձնել Վիքիպեդիա ազատ հանրագիտարանի խմբագրմանը, պայմաններ ստեղծել նրանց ազատ ժամանակն օգտակար և արդյունավետ դարձնելու համար։

Վիքիակումբում խմբագիրները ոչ միայն զարգացնում են հայերեն վիքիպեդիան, այլև ինքնակրթվում են և կատարելագործվում։